جريدة اللواء العربى تهنئ اللواء محمد الشنهابى بمناسبة تنصيبه رئيس مجلس إدارة فالكون-جريدة اللواء العربى

 للكاتبة المصرية  إيناس المغربي

مالك يا دنيا بقيتي قاسية .. كلك آلام وفيك أسوة   ... 

مكنتيش زمان وحشة وكاشرة ..

كإن بحلاوتك يا دنيتنا ..

 مفيش عذاب و مفيش أخرة .. !!

كانت القلوب كده منطاعة .. وكانت العيون مش بصاصة .. 

ولسانا حلوعليه طلاوة ..

والقلب يحن وبيدفدف.. !!

و كلام من بقق بينقط ..

ساعات سكر وساعات عنبر  ..

عمري ما يوم دوقت الحنضل

ولا  قلبي عاش ليلة متكدر .. !! 

ويوم مبكي الله لا قدر ..

ودموعي تجري و تهطل ..

إلا وإيد حلوه حنونة على صدري دايماً بتطبطب .. !!

مالك يا دنيا بقيتي قاسية. ..

كلك ألم  وفيك أسوه ..!!

دا كان أبوكي هو أبويا و الخال  حنون أب يشرف ..

 كانت البيوت لينا مفتوحة ..

والطبلية كده محطوطة ..

  للجاي والرايح ادخل شرف ..!!

كل ما دق على بابك واطلب طلب من خدامك إلا و لقيته بيتحضر  .

قبل ما خبط على بيتنا ..

تناديني خالتي جارتنا ..

 تسعد قلبي بطلتها وتفرح عيني بنظرتها

  وتقولي :

 يلاه تعالى خش أتفضل..

وقبل ما أدوء طبخة بيتنا .. تروح تديني من طبختها طبق محمر ومشمر  ... !!

 وف يوم العيد بابنا يخبط .. بنت جارتنا جايه تكركر ..

صينية كحك خُد اتفضل .. بفرحة قلب مرشوشة ..

وبروح الورد كده مرصوصة

 من اللي يودك واللي يقدر ..!!

ويوم فرحي ويوم سعدي أسمع حارتنا بتزغرط  ..

أي مساعدة .. احنا عنينا .. لا يمكن ابداً نتأخر .. !!

جرى إيه لدنيتنا بَخلت علينا وكرهتنا وهونا عليها وكرشتنا ..!!

أصبحتٍ الآن ملكيش لازمة، وحولتي عنينا على الآخرة ..

قلوب سودا عيونها حسودة بتبص بحقد وتتحسر .. !!

أحوال غيرك شيئ بيحزن .. مد فجيبك شخلل طلع ..ساعد غيرك ولا تضلع ..

مالك لغيرك مش هتعمر ..!!

مالك يا دنيا بقيتي قاسية ..

كلك آلام وفيك أسوة ..!!

 أبداً ما بقينا نعيش لحد ..

وتْبنى بنا مليون سد ..

أصعب شيئ تعيش وحيد ..

من غير حب و من غير قلب ..!!

و ازاي هنكمل الطريق ..

 والغربة جوانا ملهاش حد ..!!

حكُّم عقلك حب بقلبك .. 

ابني لغيرك وابني لنفسك  .!!

بيتك هو أخرتك وفرشه هو مساعدتك ،وعملك بكرة هيسعدك والله عند محاسبتك، لو كنت أبدا ما قصرت ..!!

 لكن .. لما يسألوك ..ساعة ميقوموك ..

فين رحمك أنت وصلتهم ؟!!

ولديك  فكرت تبرهم ..؟!! أخواتك وقفت جنبهم ؟!!

هيكون أيه ساعتها الرد ..!!

ساعتها ابدا ما فكرت ؟!!

أعمل اليوم لآخرتك وسيب بكرة لدنيتك 

كأن اليوم قبضتك وبعد ساعة مُحاكمتك  قدام الحكم العدل .. !!

ااااه يا دنيا يا خداعة..

خلاص يا فانية يا فتنانة ...

سرقتي العمر ونهبت الوقت  ..  قوليلي بالحق :

ليه الدناءة وليه البذاءة و فين المروءة ؟

والله دلوقت ما ليكي عوزة..!!

دلوقت بس أنا فكرتك ..!!

هروح أدورلي على عشة فيها كام فرخايه وكام وزة..

 وأبني هناك برج حمام بعيد عالبوم والغربان وجنبيها طرمبة ماية ..!!

وأرجع _لوحدي_ زي زمان أغسل قلبي بالقرآن وأمد أديه للغلبان، وأدعوا ربي بكل إيمان .. !!

ياااارب نرجع زي زمان .. يارب نرجع زي زمان